ونه ودمعة عين

على راس رجم مابدابه كون إثنين
حرامٍ على مستريح البال يرقى به

بداه الفقير المؤمن اللي جفاه الدين
وسلّم إيديه لواحدٍ ماقفل بابه

وسجد ركعتين وفاضت عيونه الثنتين
وطلب عفو ربه يوم لقياه وحسابه

وبداه الجريح اللي فقد نعمة السالين
بعد ماتفاقت سود الأيام بأحبابه

بدابه وهو مابين يالله وبين آمين
لعل الفرج في طلعة الرجم وأرقابه

وحوّل وهو مابين ونه ودمعة عين
وضح من صواديف الزمان وتقلاّبه

لمح يوم شرّف تالي ضعونهم مقفين
شـ هاتيك قطعان أريش العين وركابه

على وين مدري..لكن أقفوا ولاأدري وين
تناحوا وقفوا عاد لي فيهم طلابه

بغت كبدي من فراقهم تنقسم نصفين
وسمها الحزن وظروف الأيام غلابه

وجودي على ساعة لقا عاد حن حيين
وجودي عليه وبري حالي من غيابه

ياصعب المفارق بين الأحباب والغالين
خصوص إليا صرت واحدٍ من أسبابه

فراقٍ يجي من بعد عشرة ثمان سنين
ولافيه يوم مرنا ماألتقينا به

تمر السنين ويمضي من العمر ثلثين
وأنا كل يوم يمر ماأفكر إلا به

أقول أسقني بأموت.. ويقول لي بعدين
يـ لين أقفت سود الليالي بمشرابه

طوير الوصل كسر جناحه وطار بزين
وخدين المفارق جاك يومي بمشعابه

غدت جيته حُرْمٍ علي ليوم الدين
وغدت شوفته لو هي على الطاير نهااابه

يقولون بعد القلب ماهو بعد العين
وأنا أقول بعد القلب والعين متشابه

تراني نذيرك ياقتيل الهوى المسكين
نصيحة مجرب مرّه الحزن وأقفابه

دخيلك تجنب قول عاد حن ممدين
الأيام عجلة والعمر مايضحى به